Parlamentlararo ittifoqning 150-Assambleyasi

Parlamentlararo Ittifoqning 150-Assambleyasi - tarixiy voqea

Bugungi kunda, beqarorlik, murakkab geosiyosiy jarayonlar, tanglik va dunyoning turli mintaqalarida o‘sib borayotgan iqtisodiy inqirozlar fonida milliy manfaatlarni xalqaro maydonda samarali ilgari surish faol tashqi siyosat orqali muhim ahamiyat kasb etmoqda. O‘zbekistonning ayni murakkab sharoitda butunlay yangi mazmun kasb etayotgan faol va pragmatik tashqi siyosati tufayli mamlakatimiz dunyo siyosatining markazlaridan biriga va global tashabbuslarning muallifiga aylanib bormoqda. Mamlakat parlamenti ham ushbu jarayonda faol ishtirok etmoqda. Jumladan, yirik xalqaro parlament tuzilmalarining to‘laqonli a’zosi sifatida nufuzli konferensiyalar o‘tkazib, muhim taklif va tashabbuslarni ilgari surmoqda. Bunga yorqin misol sifatida Buxoroda Barqaror rivojlanish maqsadlarini amalga oshirish bo‘yicha Xalqaro parlament forumi hamda Toshkentda IPU bilan hamkorlikda bo‘lib o‘tgan 14-Parlament spikerlari ayollarining sammitini muvaffaqiyatli tashkil etishni ko‘rsatish mumkin. Ma’lumki, O‘zbekiston Respublikasi Prezidenti Shavkat Mirziyoyev 150-IPU Assambleyasini O‘zbekistonda o‘tkazish tashabbusini ilgari surgan edi. Shveysariyaning Jeneva shahrida IPU Bosh kotibi Martin Chungong va Oliy Majlis Senati Raisi Tanzila Norboyeva 2025 yilda O‘zbekistonda 150-IPU Assambleyasini o‘tkazish bo‘yicha kelishuv imzoladilar. Ta’kidlash joizki, 181 davlat parlamentlarini birlashtirgan ushbu nufuzli tuzilma o‘zining oliy organi – Assambleya yig‘ilishlarini parlamentarizm va barqaror rivojlanish borasida ijobiy tajribaga ega bo‘lgan mamlakatlarda o‘tkazadi. Markaziy Osiyo mintaqasida ilk bor O‘zbekistonda Assambleyaning o‘tkazilishi Prezident Shavkat Mirziyoyev rahbarligida mamlakatda amalga oshirilayotgan demokratik islohotlar va parlamentarizmni rivojlantirish borasidagi sa’y-harakatlarni jahon hamjamiyati tomonidan tan olinganidan dalolat beradi. Mintaqamizda birinchi marta bunday keng ko‘lamli parlament tadbiri o‘tkazilishi O‘zbekiston parlamentining Barqaror rivojlanish maqsadlarini amalga oshirishdagi faol ishtiroki, xalqaro standartlarga muvofiq qonunchilik bazasini takomillashtirish, inson huquqlarini himoya qilish va gender tengligi masalalarini parlament darajasida ilgari surish hamda yoshlarning Qonunchilik yoshlar parlamenti doirasidagi faoliyatga keng jalb qilinayotganini ko‘rsatadi. IPU Assambleyasining mamlakatimizda o‘tkazilishi parlamentlarga xalqaro kun tartibidagi dolzarb masalalar yuzasidan tajriba almashish, O‘zbekiston parlamenti faoliyati bilan yaqindan tanishish, parlamentlarning 2030-yilgacha Barqaror rivojlanish kun tartibini amalga oshirishdagi ishtirokini kengaytirish, BMTning Barqaror rivojlanish maqsadlariga erishishda parlamentlar o‘rtasidagi hamkorlik imkoniyatlarini muhokama qilish, inson huquqlari, gender tengligi, yoshlar huquqlarini kengaytirish va iqlim o‘zgarishiga qarshi kurashish borasida hamkorlikni yanada mustahkamlash imkonini beradi.